徵友表格

《誠實渣男的默劇》更新至第十三章

13 422

#1 I’m you

渣男?通常都是被認為是一個player。但是天生就是?還是因身邊的人和自身的經歷而變成的?「謠言」和「情感」可以改變一個人,但自身也是其實身不由己⋯

13 422 11/16/2018 12:17
11/16/2018 12:17

  1. #2 I’m you

    請簡要解釋為什麼你覺得應該要舉報這個回覆。

    報告
    取消

    第一章

     

    「喂⋯你係咪永遠都會咁愛我㗎⋯」

     

    「乜我有話過唔愛妳咩?」

     

    「係喎,嘻嘻~」

     

    「咁⋯」

     

    「叮叮叮⋯」擾人清夢嘅鬧鐘唔適時咁打斷我嘅美夢,將我拉回現實⋯

     

    「嗯⋯原來已經咁晏㗎喇⋯」我㩒熄咗喺我隔離嘅鬧鐘,上身半裸、慢慢咁行去洗手間⋯我用手撐著洗手盤,望住鏡入面嘅自己,滿面鬍鬚,喺光線下顯出微啡嘅頭髮蓬鬆且凌亂⋯ 身上嘅肌肉線條仲好分明,隨住我嘅一呼一吸上下起伏。以前嘅我,一身肌肉帶俾人一種陽光少年嘅感覺,但係可能就係因為我身材唔錯,個個都覺得我好多女圍,身邊肯定唔只一條女,所以⋯當謠言一起,大家都覺得所有嘢都係我錯,係我辜負佢在先。兩年來每一晚都係發同一個夢⋯有人話:「愛嘅反面就係恨」我自己都分唔清,我腦入面時常都閃過我同佢一齊時嘅片段,但我好肯定我已經唔再愛佢。咁既然唔係愛,唔通係恨?但比起恨,我心裡面更多嘅係傷痛。可能係耐咗,無人會再相信我嘅清白,佢哋都已經徹底咁相信我係一個「渣男」,我就算話「我唔係」,但已經有一班盲從附和嘅人相信咗,咁我講多都無謂⋯咁與其被誤會,咁就不如順水推舟,成為一個真正嘅「渣男」。

     

    喺我攞起鬚刨剃鬚嘅時候,一把女人慵懶嘅聲線喺門外發出。我擰頭一望,見到一個著住黑色性感內衣嘅女人從我房間出黎,睇黎⋯我尋晚又闖咗禍喇⋯

     

    ?:「嗯~你起身喇~」佢嗰把挑逗嘅聲線,如果換著係其他男人肯定把持唔住,但我卻無動於衷⋯

     

    我:「小姐?妳邊位?」我只記得我尋晚落咗酒吧,飲咗啲酒,我記得我抱住咗一個女人⋯之後就乜都唔知喇⋯

     

    ?:「搞錯呀,尋晚明明咁Happy,不過同緊我搞嘢又叫住第條女個名嘅人,都真係得你一個⋯」

     

    我斜眼望咗佢微微化開嘅彩妝,好唔耐煩咁答佢:「係咩,咁恭喜妳啦。」我呢刻淨係想快啲打發佢走,想自己靜靜

     

    ?:「叫咩名呀?RachelSallyNora?喂,叫咩啫嗰條女?」

     

    我:「Rebecca呀⋯」我一邊行返入房執被,一邊用冷淡嘅語氣答佢。我好唔想再提起呢個名,但呢個名卻偏偏喺我腦海中揮之不去⋯

     

    ?:「哦~Rebecca 喂,有冇下次啫?你唔錯喎,有身材,有姿勢。不如⋯」呢刻嘅佢已經換好衫,身著祕書服、黑絲襪嘅女人。

     

    我:「走吖唔該,我唔想再見到妳⋯」我一手推佢出到屋門,並大力拉開屋門,「笑」住咁同佢講

     

    ?「估唔到你咁無情趣喎⋯唉,嘥氣⋯」佢講完就踩佢對恨天高行出咗門口,留低咗一陣混合住煙酒臭氣嘅香水味⋯呢刻,我唯一嘅淨土又回復平靜⋯

     

    「終於俾我有機會靜一靜⋯」我行入個浴缸到,不斷用溫水沖洗我嘅身體,我嘅雙眼,我嘅靈魂⋯

     

    ==============================

     

    「點解妳要咁對我呀!」

     

    「因為你廢囉,無錢,成績差。」

     

    「就係咁!?我哋一起咗五年,結果妳唔單止一啲都唔留戀,仲俾帽我戴。你真係忍心就為咗妳嗰啲無聊嘅原因,拋棄我哋咁以黎一齊制造嘅回憶?」

     

    「係呀,咁又點啫?我一直都係喺到利用你,當你玩具咁玩。咁玩厭咗喇,咪換囉。好正常啫~你唔係以為我同你會一生一世呀?」

     

    「係,我太天真⋯」

     

    ================================

     

    「啊啊啊啊啊啊啊!」

     

     

    「當太多人相信同一個謊言,咁虛構嘅現實就會成真。」

     


    11/16/2018 12:18
  2. #3 I’m you

    請簡要解釋為什麼你覺得應該要舉報這個回覆。

    報告
    取消

    第二章

     

    「下一班香港大學,next stop: Hong Kong University」

     

    我以前諗過讀完大學就同佢結婚,我並唔係想做個好成功嘅人,我只係想⋯同佢一齊有個幸福家庭啫⋯可能你會話我一畢業就綁住人,好大男人主義啦,但係我係因為好愛佢,所以先想全心全意咁為佢付出一切⋯

     

    ?:「喂~阿泓~」喺我身後有把我聽咗多年嘅聲音叫我個名⋯

     

    我:「哦~咁啱呀永文。」永文係我嘅青梅竹馬兼同門師兄,一個超級武痴、近到住喺隔離嘅鄰居。佢亦都係少數知道成件事真相嘅人,不過一隻手掌拍唔響,得佢一個都係無能為力⋯

     

    我小學時期好唔鍾意做運動,佢就借啲易拉咗我去佢老豆間武館學截拳道,佢話:「截拳道既可以受傷,又可以鍛煉反應,喺短時間之內快速回擊」過咗半年之後,我已經學晒之後入門嘅招式,但我仲想學更加多嘢,正所謂「知己知彼,百戰百勝」所以我仲研究埋柔道、空手道同拳擊,短短幾年就學識晒我想學嘅武術。有次我見到永文俾人打傷,一時衝動想幫佢報仇,所以搏哂命咁打嗰個人,差啲搞岀人命。師父大鬧咗我一餐之後,好在永文幫口講好說話,如果唔係我會被逐出師門。之後師父訓練我哋平和,唔好意氣用事。要我哋深藏不露,盡量唔好俾人知我哋嘅實力。出手前要用雙眼去睇對方出拳嘅方式,用耳去聽對方嘅呼吸。如非必要,唔好出手。我原本都諗住無人會發現到,但Rebecca嘅出現令我感到平靜,我少咗去練武,而係專心學業,但有時都會自己會去做gym,以保持身材同埋師父嘅教訓。

     

    永文:「點呀?我琴晚聽到你好夜先返屋企喔,搞咩呀?又落bar呀?」

     

    我:「咁都俾你聽到⋯」

     

    永文:「嗰陣我咁啱冥想緊吖嘛,喂,你返唔返武館呀?你走咗之後,得返我同師父睇住間武館,我想搵你幫手呀!」

     

    我:「我講咗,我唔會再⋯」話口未完,佢就一拳打埋黎,我用雙手先接得住,佢呢拳充滿住濃烈嘅殺氣,如果我接唔住,肯定要入醫院⋯ 我同永文唯一唔同嘅係,佢注重嘅係力量,因為佢細個嗰陣偏肥同矮,師父要佢重視力量,咁就可以一抓到人就一拳搞掂。而我偏重嘅係速度,因為師父話我嘅反應同觀察能力強,要我訓練喺短時間內判斷對手嘅套路然後用相應嘅招數抵擋。

     

    永文:「果然仲喺到⋯」

     

    我:「你明想我入院啫⋯咁一拳中埋黎⋯」

     

    永文:「係你嘅話,實接得住㗎~」

     

    我:「自然反應黎啫,唔講住先。我上堂先,等間見⋯」

     

    永文:「天才真係天才,等間見。」

     

     

    「如果暴力或金錢就能解決得了的問題,那根本就不是問題。」

     


    12/12/2018 00:47
  3. #4 I’m you

    請簡要解釋為什麼你覺得應該要舉報這個回覆。

    報告
    取消

    第三章

     

    「嗯⋯」

     

    「不如換個地方食飯啦⋯」

     

    以往我哋上完堂之後,都會去最近學校嗰間譚仔,嗰到亦都係離我哋學校最近嘅餐廳,無計,我哋兩個都唔係啲咩死臭宅。唔係餐餐都食麥記、大快活就可以搞得掂⋯我就話可以一餐頂幾餐啫⋯但永文呀⋯哈哈⋯

     

    永文:「啊唔該,我要~雞肉加雲吞加紫菜加白菜再加粗麵同加辣,唔該曬~」區區一間快餐店點解我哋兩個食呀⋯我嘅食量都已經夠驚人啦⋯,而永文嘅食量係我嘅四、五倍⋯食咁多就係為咗平衡身體所需嘅營養,以前第一次同Rebecca食嘢嘅時候,佢都嚇親⋯

     

    ===========================

     

    Rebecca:「嘩⋯你平時都食咁多㗎?」佢手指住我碗「傑作」,面上嘅驚訝表情,而家我都好記憶猶新⋯

     

    我:「咁我餓吖嘛⋯同埋妳係咪唔食㗎喇,俾埋我呀。」

     

    Rebecca:「嗯,但⋯」佢話口未語,我就一手拿咗再佢剩咗一半之前嘅飯

     

    個次係我同佢第一次見面,嗰日係我哋咁啱都係俾阿sir留堂,所以只好食飯盒⋯我估唔到我竟然咁夠薑搶女仔飯盒黎食⋯

     

    =============================

     

    「喂,嗰個師兄咪啲人成日講嗰個「渣男」?」

    「喂,佢咪係嗰條「人渣」?」

     

    呢啲擾人嘅閑言閒語,好似一拳一拳打喺我心上,迫我諗返起現實。件事雖然已經過咗年幾,但估唔到知道嘅人竟然係有增無減,睇黎Rebecca都係算留低咗個好名聲喺大學裡面⋯

     

    我:「哼⋯估唔到⋯」我正當想攞起筷食嘢嘅時候,我被我眼前嘅位人兄嘅行為驚親⋯

     

    永文:「阿泓,點解你可以忍咁耐㗎!你大可以一拳打冧晒啲Pk㗎!我哋兩個實搞得掂㗎!」佢嘅右手抓住枝未開嘅可樂,我清晰見到罐上嘅握痕⋯

     

    我放低我手嘅筷子,好理性咁同佢講:「咁你想點?而家即刻衝過去打佢一餐?得!咁你同我諗定之後點同學校解釋,同點同師父解釋!」呢刻嘅我心裡係憤怒,係怒火中燒嗰種。但越係呢種情況,但越需要理性、冷靜。我要等一個機會,我要報仇雪恨,但亦唔可以違背師父嘅教誨。而家嘅我只可以等,等一個可以一掃而空嘅機會。

     

    「有時有啲決定,會影響身邊所有人,最重要嘅,係會影響自己一生。」

     


    12/12/2018 00:48
  4. #5 I’m you

    請簡要解釋為什麼你覺得應該要舉報這個回覆。

    報告
    取消

    第四章

     

    「一共35蚊⋯」

     

    同完永文食完午飯之後,我就去咗返我份兼職,兩年前同Rebecca分手之後,日日唔係落酒吧就係喺屋企頹廢咁過⋯俾阿媽打完一鑊之後,佢就介紹咗我去佢個fd開嘅茶餐廳做收銀,阿媽叫到⋯咁無得唔做啦⋯同埋,與其喺屋企等到發霉,不如搵啲嘢做,咪當賺下零用錢囉⋯

     

    Sarah:「喂~琴晚條女掂唔掂呀?佢對妳好評不斷喎~」佢係老細個女,我第一日返工就俾佢日日煩⋯ 久而久之就熟埋。熟咗之後,佢就日日拉我落bar飲酒同要我保護佢⋯ 最後就要我陪佢癲埋一份⋯ 

     

    我:「真心咪搞我啦。琴晚唔係因為妳係咁灌酒,我使醉!?真係俾妳害死⋯」

     

    Sarah:「咩喎~我諗住俾你放鬆下吖嘛~唔通你⋯你諗住食咗我?」佢講完使揞住全身⋯佢呢種既冇身材又爛滾嘅女人,真係唔知佢遮黎做乜⋯

     

    我:「小姐⋯妳呢啲咁嘅爛滾女,我完全係無!興!趣!」

     

    Sarah:「你!你⋯哼!」

     

    佢講完就好嬲咁踩住高踭鞋一嘢衝咗出去,睇黎真係俾我踩中咗地雷⋯

     

    我:「唉⋯得嗰18歲就咁,唉⋯」

     

    老闆娘:「真係辛苦晒你呀!阿泓。晚晚都要睇住我個女⋯」老闆娘行過黎,佢係一個非常和藹可親嘅女人,頭上一絲絲嘅白髮,語氣好溫柔。有時真係會諗「如果佢係我阿媽就好咯」。

     

    我:「唔辛苦。我今晚會捉返佢返黎。老闆娘妳唔使咁擔心。」

     

    老闆娘:「唉⋯佢以前好哋哋,成績、操行各樣嘢都無問題。就係遇到嗰個衰人,搞到阿女無心向學。入咗大學又唔返,日日掛住飲酒⋯」

     

    我:「佢都係一時迷失咗啫。放心啦老闆娘,我會幫妳睇住佢。」講完我便除低個圍裙,去拉返Sarah返黎。

    「七點幾呀⋯」通常係呢個鐘數,佢九成係去咗酒吧。

    「我走先喇老闆娘,聽日見啦。」

     

    老闆娘:「嗯?嗯!哦!拜拜⋯」

     

    「家人嘅支持係人嘅一大動力,冇咗就好難再搵得返。」

     


    12/12/2018 00:49
  5. #6 I’m you

    請簡要解釋為什麼你覺得應該要舉報這個回覆。

    報告
    取消

    第五章

     

    Sarah佢人呢?」

     

    又黎到蘭桂坊呢個酒池肉林,呢兩年除咗喺屋企同學校之外,就係黎呢到飲酒。而家諗返係嘅話,我覺得自己都算好彩⋯點解?因為我醉嘅時候冇打爛嘢,而係瞓著咗⋯

     

    豪:「喂,又黎搵女呀?」豪哥係呢間酒吧嘅老細,以前我每晚都係落黎呢間Sweet Dreams酒吧。喺同一個鐘數黎,坐同一個位,再喺同一個鐘數走⋯佢晚晚都睇住我,防止我闖禍⋯

     

    我:「唉⋯冇計⋯佢人呢?」

     

    豪:「咦?佢呀⋯咪喺嗰到囉。」佢指向不遠處趴喺枱上面,已經醉到不省人事嘅少女⋯我行過去,坐喺佢隔離。聽見佢呼呼入睡嘅樣,真係覺得佢瞓著個樣可愛得多⋯

     

    我:「咁咪好囉,收埋把口即刻靚女幾多⋯」正當我諗住慢慢等佢起身嘅時候⋯

     

    ?:「鬆開你對臭手呀!」一陣尖銳嘅尖叫聲,我下意識望向聲音嘅來源,見到一個女仔比條友捉住咗對手⋯不過呢啲嘢酒吧算係家常便飯,正當我諗住無視佢哋嘅時候⋯

     

    「砰!」玻璃破碎嘅聲音再一次令我不由自主咁望咗過去,原來嗰位小姐比條友推跌咗⋯但係周圍嘅人有啲同啱啱嘅我一樣掂行掂過,當睇唔到,有啲想上前幫手,又唔夠膽,總之冇一個人救到佢。我望住個女仔喺暗綠燈光下微微顫抖嘅背影,暗暗握緊拳頭,終於覺得自己要做返啲嘢⋯

     

    我:「小姐!小姐!」佢頭上有輕微受傷,但唔係好嚴重。

     

    男:「走開啦!唔關事嘅行開!」個男人滿面通紅,眼神空洞。睇黎都係醉酒犯事。通常呢啲情況講多無謂,醉酒嘅通常都係「左耳入,右耳出。」唉⋯

     

    我:「先生⋯」話口未完,個男人就一拳飛埋黎,不過比起永文,慢得多⋯可以輕鬆避開。

     

    第一拳

     

    「先生⋯」

     

    第二拳

     

    「唔好意思⋯」

     

    第三拳打埋黎嘅時候,我閃身避開,再起腳絆倒佢。喺佢搖搖晃晃咁撐起身,一邊低聲咒罵邊想還手嘅時候。佢企返身想還手嘅時候,我一拳打落佢返面到。

    「唔該你,唔好起身。」

     

    我:「豪哥,幫我睇住佢哋,我去一去七仔買繃帶⋯」

     

     

     

    「拳頭唔應該用來傷害人,而係用來保護他人。」

     


    12/14/2018 01:43
  6. #7 I’m you

    請簡要解釋為什麼你覺得應該要舉報這個回覆。

    報告
    取消

    第六章

     

    「嗯⋯嗯⋯」

     

    「小姐,妳好返啲喇嘛?」

     

    過咗一段時間之後,啲人都返晒去,但我仲要等兩位小姐起身。而豪哥頭先目睹哂成件事嘅全過程,我諗都可能會嚇親佢⋯

     

    豪哥:「阿泓你有練過武㗎?咁堅抽嘅?」

     

    我:「哈哈⋯打過下拳咁啫⋯」

     

    豪哥:「今次都係多得你咋。如果唔係聽日可以準備上頭條呀⋯」

     

    我:「啊⋯呵呵⋯」

     

    ?:「嗯⋯嗯~」細聲嘅反身聲,睇黎係嗰位小姐起咗身

     

    我:「小⋯小姐?」

     

    ?:「啊⋯我喺邊呀?啊!個頭有啲痛⋯」

     

    我:「我建議妳就唔好亂郁喇⋯妳啱啱俾個陌生男人推跌咗,扑傷個頭。使唔使我送你去醫院檢查下?」

     

    ?:「唔⋯唔使⋯」佢摸一摸個頭,發現個頭已經包紮好

    「請⋯請問係咪你幫我包紮㗎?唔該晒⋯」佢講呢句嘅時候滿面通紅,怕醜嘅女仔竟然會喺呢啲咁嘅地方出現⋯佢仲要著住長身牛仔褲同著連帽黎呢到,睇黎⋯

     

    我:「小姐,請問你係咪第一次黎呢啲地方㗎?」

     

    ?:「你點知㗎!?」

     

    我:「喔⋯憑感覺啫。」

     

    ?:「我係黎搵朋友啫,係一個女仔。叫Sarah⋯咦?咪佢囉。」佢指住依然沉睡緊嘅Sarah

     

    我:「原來係熟人個朋友,估唔到佢會有朋友喎⋯」

     

    ?:「原來妳都識佢嘅!早知我就唔理佢啦!」

     

    之後就好跳兩千字,內容係「Sarah本質唔錯」「佢係Sarah嘅中學同學」「佢收到Sarah嘅訊息話搵佢散心」同埋⋯

     

    「係呢,講咗咁耐。妳叫咩名呀?我叫阿泓。」

     

    「我叫Tiffanynice to meet you😊」甜美嘅笑容,微微露出嘅兔仔牙,迷人嘅小酒窩。嗰股天真無邪嘅感覺,令我到而家都好記得。

     

     

     

    「你嘅溫柔未必能使對方仁慈,但最少你有表達你對人嘅尊重。」

     


    12/20/2018 23:45
  7. #8 I’m you

    請簡要解釋為什麼你覺得應該要舉報這個回覆。

    報告
    取消

    第七章

     

    「你今日咁精神嘅?好少見喎~」

     

    「最近瞓得好啫。」

     

    過咗嗰日之後,發嗰個夢嘅次數少咗。心裡面睇黎都開始放低咗。不過,現實嘅情況卻依然冇變。

     

    我:「我上堂先,等間再傾。」

     

    永文:「噢,等間電聯呀。」

     

    我:「嗯⋯」

     

    我入到課室,行到我平時坐嗰個位。今日唔同嘅係:今日張枱突然多咗張紙仔,上面寫住:「劉浩泓,等間黎暗區。」條友用枝冇墨嘅淺藍色原子筆,連我個名都寫錯⋯唉⋯9成9係撩交打。暗區,故名思義就係學校嘅灰色地帶,嗰帶係屬於學校嘅重建區,所以一直都未裝攝錄鏡頭,一般煲煙或打交都係嗰帶發生。但係,究竟係邊個要我過去呢?叫我去做乜?唉算啦,到時先算⋯

     

    「開始上堂。」

     

    過咗一個鐘之後

     

    我:「邊個叫我落黎㗎?連我個名都唔識寫讀乜鬼大學呀?」

     

    講完就有一班人企咗起身,大約六、七人到啦。既有瘦到見骨嘅,亦有啲肥仔嘅。個個懶兇神惡煞咁⋯但,我嘅感覺就如同見到班喺動物園嘅動物咁,以「觀賞」嘅心態去望住班傻仔。

     

    ?:「就你呀!?溝我哋大佬條女個條粉腸?」

     

    我:「溝女?你講乜呀?同埋,邊鬼個係你大佬呀?」

     

    ?:「呢條女呀!」佢攞起部電話,我喺不遠處睇張相,相裡面有對美滿嘅情侶。左邊嘅係我哋大學柔道嘅代表「王洛誠」,隔離嘅⋯哼⋯

     

    我:「你哋,做兵都唔使做到咁喪好喎!」隔離嘅係Jessica,人稱「傀儡師」食仔無數,對男人心理暸如指掌,仲利用呢點黎操控啲傻仔。仲以為有個男嘅可以令佢從良,睇黎我都係太天真。

     

    ?:「你收聲!區區渣男!我哋今日就要幫女神討回公道!」佢哋講完就準備郁手,而我亦準備好捱打嘅時候⋯

     

    「喂!你哋做咩呀?」有把好熟悉嘅聲音喺我後面發出,係李教授。

     

    ?:「冇⋯冇呀!」條友亦都好大聲咁覆佢,驚死教授聽唔到咁⋯

    「我⋯我哋走先喇⋯」講完就急急腳走咗,成隻過街老鼠咁⋯

     

    李教授:「冇嘢吖嘛阿泓?」

     

    我:「冇事,唔該晒。」

     

    李教授:「冇嘢就好喇。雖然我都唔太清楚你哋學生之發生啲咩事,不過點都好。記住⋯」

     

    我:「『暴力並非方案』吖嘛,知㗎喇~」

     

    李教授:「咁我去上課先,遲啲見。」

     

    我:「嗯⋯byebye。」

     

    點解李教授會入黎暗區嘅?一般情況下係冇教師或校工入黎㗎⋯咁係⋯

     

    「哈囉~阿泓~」

     

    「原來係妳⋯Mel姐⋯」

     


    01/01/2019 02:47
  8. #9 I’m you

    請簡要解釋為什麼你覺得應該要舉報這個回覆。

    報告
    取消

    第八章

     

    「妳點知我喺到㗎?」

     

    「喔~我咁啱見到你行咗去暗區,怕會有咩事,以防萬一就叫咗李sir黎幫手。」

     

    mel係永文嘅女朋友。你話永文幾時有女㗎?我都想知呀。唔好睇阿mel得嗰一米五咁細粒呀,佢係我哋學校嘅優等生兼學生會會長,係我認為喺學校裡面僅存有正常邏輯思維,同明白事理嘅人,所以我覺得佢同永文都真係幾襯。作為見證佢哋由曖昧到牽手嘅媒人,我都想佢哋一直幸福落去~

     

    到咗譚仔之後

     

    永文:「老婆,黎~啊~」

     

    Mel:「啊~」

     

    呢兩公婆真係⋯

     

    我:「啊⋯兩位呀⋯小弟就喺到嘅⋯如果要曬恩愛,唔該上賓館曬呀,順便做埋下半部分。之後我就會換定西裝接你兩個入聖堂㗎喇~」

     

    Mel:「喂呀!」

     

    永文:「哈哈~阿泓都係講下笑啫。Sorry呀~」

     

    我:「真係服咗你哋。你哋點解可以拍咗三年都好似第一日拍拖咁恩愛都有嘅~」係呀你冇聽錯,阿mel係由第一日入學校就追永文㗎。我之前都問過阿mel

     

    =================================

     

    我:「啊,小姐。妳日日跟住我哋兩個算點呢?」

     

    mel:「我唔係跟蹤你,我係跟緊佢呀。」

     

    我:「永文?妳⋯妳鐘意佢呀?佢情盲兼武痴黎㗎喎⋯同埋,佢塊面又黑又多瘡。成績又唔好⋯你鐘意佢啲乜呢?」

     

    mel忍唔住笑咗一聲,之後就再收唔住滿面嘅笑容:「乜你咁話你個friend㗎。我就係鐘意阿Ken佢係武痴呢一點,因為佢可以專注於一件事上面咁多年,冇任何嘢可以阻止佢練武。同埋佢塊面成隻啤啤熊咁~好得意呀~」

     

    順帶一提,永文英文名叫阿Ken,係佢貪個名夠短又易記先改⋯我好少叫佢阿Ken,所以一聽到同佢唔係好熟嘅人咁叫佢,就會莫名有啲老尷~但係嗰一次,我望住阿mel微微彎起嘅雙眼,見到裡面蘊含嘅認真同堅定,就不自覺咁相信,呢個只係識咗幾個禮拜嘅女仔,可以俾到永文幸福。

     

    而佢真係冇令我失望。

    =================================

     

    雖然我當時係有俾佢嘅回答感動到,不過都仲係有少少唔敢相信,加上嗰陣正正就係我啱啱開始俾人傳係渣男嘅時候、之後,我都係決定相信阿mel嘅真心,幫佢手追永文。結果?你見到啦。

     

    「黎喇,啊~」

     

    「老婆,小心熱呀。」

     

    睇黎⋯我冇做錯決定。

     

     

     

    「最好的相處之道:視十年如一日。珍惜同你伴侶一起的每一分,每一秒。因為你不會知道,幸福什麼時候會突然在你指尖溜走。」

     


    01/11/2019 19:37
  9. #10 I’m you

    請簡要解釋為什麼你覺得應該要舉報這個回覆。

    報告
    取消

    第九章

     

    「係呢,阿泓呀。啱啱嗰班人係?」

     

    「係Jessica啲兵⋯」

     

    食完嘢之後,喺行緊返屋企嘅途中⋯

     

    永文:「Jessica?以前同Rebecca行得好埋嗰個Jessica?佢唔係已經同王洛誠一齊咗,收咗山㗎咩?做咩又出返黎,仲要搞埋你呀?」

     

    我:「我都想知⋯」

     

    永文:「聽日我哋就搵條友講清楚,之後⋯」

     

    我:「Then,你想點呢?」

     

    「係囉~你想點呀?」阿mel即刻轉咗把聲,突然間由可愛風轉咗做溫柔風,一邊笑一邊搭住永文膊頭,由膊頭一路摸上佢塊面到,仲輕轉拍咗兩下,搞到我同永文岀晒冷汗—好重寒氣呀⋯

     

    阿mel:「講啦,你想點呀~」佢個友善嘅笑容越燦爛,我就越覺得唔妥,即刻用求救嘅眼神望向永文,點知佢仲衰,嚇到面都青埋。

     

    永文:「我⋯我諗住⋯」

     

    阿mel:「係咪想打交!?」

     

    永文:「唔係!我⋯」

     

    話口未完,阿mel就已經行到佢身後:「嗚哇⋯」我望住佢揞住塊面,另轉頭勁大聲咁喊,心入面一萬個無奈:「你做咩—」

     

    永文即刻揞住我個嘴,唔俾我講出個「喊」字,睇黎阿mel已經完全知道我哋嘅弱點⋯估唔到啱啱感覺到嘅寒意係呢樣⋯

     

    永文:「我會好乖聽哂妳講㗎啦,乖啦。對唔住啊老婆。」嘩呢個閃光彈⋯

     

    阿mel:「阿泓,你先唔好做其他嘢,睇定啲先再作決定。」嘩妳係咪識變面㗎!前一秒喊完,下一秒就好似咩事都冇咁嘅⋯呢個女人好恐怖⋯

    「唔講住先喇,我同阿Ken仲要去我堂哥到幫手呀,聽日見~」

     

    我:「哦⋯哦!拜拜。」我成個人呆晒,估唔到阿mel原來係咁得人驚,連永文咁嘅武痴都俾佢食住,真係繼師父後再有一人,辛苦喇師兄。

     

    返到餐廳之後

     

    Sarah:「喂阿泓,你係咩對Tiffany做咗點咩黎呀?佢日日send訊息俾我話想見你喎。你對佢做咗啲咩!?」

     

    我:「嘩~妳難得會咁認真講嘢。不過點解一定係我對佢做咗啲嘢先?唔俾係佢鐘意我㗎?」

     

    Sarah:「佢先唔會鐘意你呢啲人呀。你個格咁衰~」

     

    我:「啊係呀係呀,都費事理妳呀。我繼續做嘢算⋯」

     

    呢個時候,餐廳門邊嘅風鈴打破咗短暫嘅寧靜—

     

    「嗯?Tiffany?」

     

     

    「人理論上應該用理性主導一切決定,才能從變不驚,但內心的感情卻總會令人生出現意外。」

     


    01/20/2019 23:18
  10. #11 I’m you

    請簡要解釋為什麼你覺得應該要舉報這個回覆。

    報告
    取消

    第十章

     

    Tiffany?做咩黎呢到嘅?」

     

    「哦,我黎搵阿泓㗎。」

     

    喺茶餐廳裡面,除咗我哋之外,就得幾個客仔。冇計,而家先四點幾五點,個個都仲未放工。不過做飲食業就係咁,多人又煩,少人又悶。做耐咗分分鐘精神分裂呀。

     

    Tiffany:「阿泓~幫我補習~」Tiffany今日著住件白色女校服配灰校裙,配一副黑框眼鏡。比起一般啲化「假妝」嘅mk妹比,佢顯得非常清純。皮膚保養得好好,白得黎又有少少淡淡紅色點綴下。但有啲奇怪嘅係,夏天咁熱仲著長袖衫嘅?可能就好似連登啲人話「啲女人四季都係著同一套校服」掛⋯

     

    我:「吓!?嗯⋯」我講下㗎咋喎⋯唔係當認真吖嘛⋯我又冇幫人補過習,唉⋯下次真係唔應該亂講嘢⋯

     

    Sarah:「噢~原來係搵阿泓做補習阿sir吖話~我仲以為佢做咗得咩令到妳要落「追殺令」𠻹~」

     

    我坐到Tiffany隔離,並對住Sarah講:「唔好亂講嘢啦,唔該。」

     

    Sorry呀,妳有咩我可以教妳㗎?」我同返Tiffany講,話晒應承咗人,唯有盡力而為啦。

     

    Tiffany:「哦⋯」佢擰轉身攞書包啲嘢,喺佢轉身嗰刻,佢一扭條頸,表情就由頭先嘅輕鬆自然變得有啲小心翼翼,一隻手撐住張櫈,一隻手嘗試伸入書包裡面,皺起眉頭好慢咁郁,仲細聲咁吸咗幾口氣,好似忍緊痛咁。我微微睇到佢後頸有紫色嘅瘀腫。應該係跌親啩⋯

     

    我:「Tiffany啊,不如我幫妳攞呀。妳要邊本書呀?」

     

    Tiffany:「哦⋯中間嗰本同上面嗰兩本。」

     

    我攞出黎之後,見到嘅係佢呢個星期前嘅測驗卷,同上次佢所講嘅「三、四十」一樣,但一樣嘅係分,唔係名次⋯

     

    我:「嘩⋯同妳上次講嘅有啲落差喎⋯」

     

    Tiffany:「我最近都冇咩點聽書同溫書,所以咪⋯」

     

    我:「哦⋯」我一邊揭開嗰幾份卷,都寫到密麻麻咁,而啲題式同步驟都用得唔差,但係計算上係有啲出錯,算係學生常犯問題黎,應該唔難解決。中文嘅話,文法同格式冇問題,但啲字都寫到好奇怪同好大力咁,同埋仲有一大段總結未寫,應該係唔夠時間啦⋯

    「嗯,一係咁⋯」我寫低一啲算式

    「妳做住呢啲數先,等間少啲客嘅時候我先再幫妳睇睇啲數呀⋯」

     

    Tiffany:「嗯⋯」

     

     

    「同一瞬間的痛相比,莫過於那長久而無止境的折磨。」

     


    02/04/2019 13:22
  11. #12 I’m you

    請簡要解釋為什麼你覺得應該要舉報這個回覆。

    報告
    取消

    第十一章

     

    「啊~終完忙完喇~」

     

    「妳齋坐咋喎,嗌咩啫妳?」

     

    過咗人流最鬼多嘅時間,我同老闆娘都忙到一腳踢,而Sarah就坐喺櫃臺後碌電話⋯真係見到都想打佢一鑊⋯

     

    Sarah:「咩呀!我有幫手收銀㗎!唔信妳問Tiffany喇!」

     

    Tiffany:「嗯?妳有嘅⋯應該。」

     

    Sarah:「喂呀!係咪姊妹黎㗎!」

     

    我:「嗱,連妳嘅『好』姊妹都話冇。咁啫係冇啦。」

    「係喇Tiffany,妳做成點呀?」做咗咁耐,終於叫做有得休息喇~

     

    Tiffany:「做完喇,不過點解比啲二次方程嘅數比我做嘅?」

     

    我:「因為呢個係去到中六都會用到嘅公式,而啱啱見妳計錯都係因為係缺乏呢方面基礎啫。」

     

    Tiffany:「哦~」「咕~」呢把耳熟能詳嘅聲音

     

    我:「不如食咗飯先咯。」

     

    Tiffany:「嗯⋯」佢面上變得有啲紅潤,睇黎係俾我講中喇⋯

     

    老闆娘:「你哋想食咩呀?Tiffany隨便叫啦,唔使客氣喎。」

     

    我:「咁我唔客氣喇~」

     

    =================================

     

    Tiffany

     

    過了十五分鐘之後

     

    我:「阿泓,你⋯」

     

    泓:「嗯?做咩呀?」同啱啱先前有高冷嘅阿泓比起黎,佢而家成口都係飯,我好似見到有隻倉鼠喺我面前食嘢⋯

     

    我:「哈哈⋯你個樣好好笑呀。」

     

    Sarah:「佢條友一見到嘢食就失晒常態㗎喇~」

    「喂阿泓,妳仲想攞埋Tiffany啲嘢食呀?你已經食咗五碗幾飯㗎喇!」

     

    泓:「咁⋯咁唔食囉⋯」

     

    我:「啊Sarah,我可唔可以喺妳到住幾日呀?」唔想返屋企,我好唔想返去見到佢⋯

     

    =================================

     

    Sarah:「又係因為佢呀?」佢?邊個佢呀?唔通佢同佢屋企人鬧交?

     

    Tiffany:「嗯⋯嗯⋯」講到呢到,佢輕輕咁嘆咗口氣,佢嘅眼神都變得黯淡起黎,睇黎佢同屋企人嘅關係非常差。但點解會突登去Sarah屋企住呢?仲要係唔止一次⋯唔通同身上啲傷有關?

     

    Sarah:「好呀,妳啲衫我仲有剩喺屋企呀。」

     

    我:「咁呀,咁妳禮拜六得唔得閒?如果得嘅話就禮拜六先再幫妳改下啲中文同埋啲數先啦。」

     

    Tiffany:「好喎,咁不如喺佢屋企到補啊?」吓⋯冇啦啦上女子屋企⋯仲要係Sarah屋企呀⋯

    咁我又冇理由叫佢黎我屋企㗎⋯嗯⋯唯有⋯

     

    我:「不如去我朋友屋企補呀?佢就喺Sarah屋企樓下,同我都識個女仔可以幫妳嘅⋯」有永文同阿mel喺到,同時又唔使俾佢睇到我屋企啲嘢,尤其我阿媽⋯安全安全⋯

     

    Tiffany:「咁呀⋯好囉。就咁話啦!唔該曬你,阿泓。😀」佢呢個笑容,看似係遮蓋佢心裡面嘅感受,似係一種自然嘅防衛機制,唔想人為佢而擔憂。

     

    「在社會當中,還能展現真誠笑容的人,都是已經看透前塵往事並勇於面對的人。」

     


    02/14/2019 16:48
  12. #13 I’m you

    請簡要解釋為什麼你覺得應該要舉報這個回覆。

    報告
    取消

    第十二章

     

    「嗯⋯啊啊啊~」

     

    「要攰到伸懶腰,睇你又真係幾攰咁喎⋯」

     

    Tiffany開頭搵我補習係話齋補星期六嘅,但後來又無啦啦話要日日補⋯阿mel又唔係日日得閒,永文又係個白痴⋯唉⋯我都唔知自己究竟點喺又要返工、真係有啲後悔自己當時咁口響⋯最近嗰兩個禮拜Tiffany仲要考試,佢主動話要補雙倍時間⋯真係有啲後悔自己當時做咩咁口響⋯不過見到佢有學到嘢,都叫做冇白費晒我啲心機嘅,希望佢考到好成績,之後就唔使煩我啦~

     

    我:「鬼叫你咁冇用咩!」

     

    永文:「咁鬼叫我唔係讀書人咩~」

     

    mel:「我就真係愛莫能助喇,鬼叫我係學生會會長咩~」呢對情侶一唱一和,真係無力回擊⋯快啲行去譚仔食完嘢,返屋企瞓覺算⋯

     

    我:「真係⋯拗唔過你哋⋯快啲比我食完嘢」「阿泓~」一把熟到爛嘅聲音將昏昏欲睡嘅我瞬間驚醒。我擰轉頭見到一個身著住黑色短T同牛仔短褲嘅女仔。

    TiTiffany!?妳做咩喺到嘅?今日唔使返學咩?」

     

    Tiffany:「哦~今日難得有教師發展日吖嘛~所以咪黎搵你囉~」

     

    我:「喔⋯」唔係掛⋯我仲以為今日有得瞓返陣先再補⋯今次睇黎真係凍過水,要俾人抽乾了~

     

    mel:「Tiffany,我哋而家去食嘢喎,妳跟唔跟埋一齊呀?」

     

    Tiffany:「好喎~反正我都肚餓,gogogo~」佢講呢句嘢嘅時候滿面笑容,比起兩個月前嘅佢開朗咗好多

     

    我哋諗住食好啲,所以就行遠少少,去咗間泰式餐廳食,話哂人哋一場嚟到,無理由要人食譚仔咁頹㗎嘛⋯

     

    入到餐廳之後,好在唔算多人,所以我求其搵咗個四人位就算。當我想行去坐低嘅時候,對恩愛夫妻隔硬兩個人霸咗一邊,分明係要我同Tiffany一齊坐⋯

     

    我:「你兩個使唔使咁急坐低呀?」

     

    mel:「咁我哋要霸定位㗎嘛~廢事有人坐咗我個位啦~」明明間餐廳都冇乜人咁制,仲霸乜鬼嘢位啫⋯

     

    我:「係係係,坐啦唉⋯」

     

    坐落黎之後,Tiffany坐咗喺我隔離。平時補習係坐對面位,所以今次佢會坐得咁埋,難免有少少尷尬,儘量同佢保持距離好啲。

     

    永文:「嗌嘢食先,阿泓你食咩呀?」

     

    我:「你知我乜都食㗎,你話事啦!我去個廁所。」

     

    我跟住指示牌行去廁所,正當我經過一條小走廊嗰陣,我停低咗腳步。喺呢一刻,嗰個我一直唔想再見到嘅人再次出現喺我面前。同佢以前嘅回憶再次無止境咁喺我腦海迴盪嘅嗰個人。

     

     

    Hi,阿泓。」

     

    Rebecca⋯」

     

     

    「人就好像一塊玻璃,裂了可以補回來,從遠處看的話幾乎就跟以前一樣,完美無缺,但如果近觀,總會看到你稀薄的靈魂上,無法掩蓋的一道道裂縫。」


    02/20/2019 18:22
  13. #14 I’m you

    請簡要解釋為什麼你覺得應該要舉報這個回覆。

    報告
    取消

    第十三章

     

    Hi,阿泓。」

     

    「點解妳會喺到?」

     

    點解?點解妳要出現?點解妳要喺而家出現呀!妳平時大部分時間都喺學校,所以我一落堂就走。有妳出現嘅地方,我就會走。我唔想再諗返起同妳一齊嘅美好回憶,因為以前過得越開心,我就越傷心。我仲係唔敢相信妳竟然可以對我哋以前嘅一切一啲留戀都冇⋯我對妳黎講到底係啲咩?

     

    Rebecca:「我係⋯我係黎搵你㗎。」佢雙眼水汪汪咁,雙手放身後,語氣帶有停頓同悔意。呢刻嘅佢同以前好唔同,比起以前更加識化妝,著嘅衫都起比以前鮮豔奪目好多。

     

    「搵我做咩?」聲到呢句「搵我」之後,我呆咗⋯我心裡好多問題,雖然我心裡面依然開心妳會主動搵返我,但⋯但我好唔明呀,妳到底想點?

     

    Rebecca:「我黎同妳復合㗎。」復合!?我好困惑呀!點解妳要喺呢刻先會想同我復合?妳嘅所作所為,嗰啲相,嗰個人,妳點解釋?之後,佢用一個好堅定嘅眼神望住我,呢一刻我個身完全郁唔到,我完全不知所措。我唔知應該點,好亂⋯

    「仲記唔記得以前我同妳講話我同我屋企人關係唔好嘅?佢哋想我同個有錢仔一齊,仲想我同你分手,啲浴照都係假㗎!我嗰日講嘅嘢都係被迫㗎!如果你肯嘅話,我哋不如⋯一齊返呀⋯」講到呢到,面上嘅一粒粒淚珠喺走廊鵝黃色嘅燈光下閃動,顯得格外憂傷⋯

     

    我:「我⋯」喺我開口之前,佢即刻靠咗喺我心口,隔住件衫都感受到眼淚嘅濕潤感,同埋佢嘅悔意⋯

    我係咪真係要原諒妳?妳當年咁樣一嘢就抹殺晒我哋一齊嘅所有嘢⋯我好憎妳⋯因為妳,我冇得好似一般大學生咁生活,我日日要避開妳,俾人當係渣男,日日都驚住俾妳同妳班friend啲兵毒打。我咁難得有返個機會,去好好咁靜落黎,一日咁行落去⋯但妳嘅再次出現,打斷晒我嘅鋪排⋯

     

    呢刻我哋都冇岀聲,我任由佢挨住我心口喊,僵硬咁企喺原地。推唔推開佢好?一切都黎得太快⋯究竟一切係岀自佢嘅真心,定係只係佢嘅

     

    「哈哈哈⋯」佢突然其來嘅笑聲打斷咗呢一切⋯

     

    Rebecca:「哈哈哈⋯你果然仲係咁天真。你真係傻㗎!哈哈⋯」佢推開咗我,輕擦咗雙眼上嘅眼淚,佢臉上露出笑容,並用輕蔑嘅聲線繼續講

    「你係咪唔記得咗呀!?吓!我係玩你㗎!你只不過就一個小玩具。我想幾時玩就幾時玩,幾時唔玩就唔玩!你?兵都不如呀!哈哈~係喇,你個樣好好笑,睇黎你仲係個以為世上有純愛嘅傻佬。」 原來佢嘅眼淚,唔係因為傷感,而係忍笑⋯我⋯

     

    我:「妳⋯」我雙手握實拳頭。我擘大眼望實住呢個我曾經愛過、珍惜過、懷念過嘅女人嘅女仔。如今變成令我絕望、痛恨嘅人渣。我點解仲佢有一絲希望,我實在大錯特錯。我點解仲要一直為咗呢個唔愛自己嘅人辛苦咁耐,夠啦!

    「啊⋯啊⋯啊!!!」

     

    喺我失控嗰一瞬間⋯

     

    「阿泓!」永文捉住我伸去Rebecca嘅拳頭,佢握得好實,應該係用盡力去阻止我。如果佢冇黎截住嘅話,我諗後果不堪設想。

     

    我:「放⋯」我望住永文嗰一刻,彷彿見返當年傷痕累累嘅佢。我再轉頭望向自己對手,呢一瞬間,我好似穿越返去當年,見到上面佈滿咗當年比我一時衝動打傷嗰個人嘅鮮血。當年我控制唔到自己,就算對方已還唔到手,但我都繼續打落去,而呢刻,假如冇永文阻止我,結局係咪又會好似嗰日咁⋯我艱難咁咬一咬牙,最終都係放低咗拳頭。

     

    佢輕撥一下俾我拳氣整亂嘅頭髮,並露出當年同我分手時一樣嘅笑容,嗰個深不可測嘅笑容。

    Rebecca:「你打我呀?哈!等睇住你聽日就知味道,我約咗人。唔得閒理你哋呀,走先喇~88」佢講完就好輕佻咁走⋯

     

    永文:「阿泓,阿泓!」

     

    我原地企咗喺到,腦海一片漆黑。我⋯做咗啲咩呀?我⋯一直以黎⋯為咗啲乜嘢⋯而容忍呢一切咁耐呀⋯

     

     

     

    「尊重是基本。但如果你連這一點也不珍惜,那你後果自付。」


    03/03/2019 17:08

回覆帖子